Unha vez superados os 365 días en situación de IT, o INSS ou o ISM son os únicos competentes para :

• - Recoñecer a situación de prórroga.
• - Determinar o inicio dun expediente de Incapacidade Permanente (IP).
• - Emitir alta médica.
• - Emitir nova baixa médica cando se produza no prazo de 180 días naturais posteriores á alta médica pola mesma ou similar patoloxía.

Durante o período de baixa por incapacidade temporal, o/a traballador/a ten dereito a percibir unha prestación económica sempre que:

- estea afiliado/a á Seguridade Social e en situación de alta ou asimilado ao alta.

- teña cotizados polo menos 180 días nos 5 anos anteriores en caso de continxencia común (en continxencia profesional non é preciso ter período de cotización previo).

A contía da prestación dependerá da continxencia (común ou profesional) e do convenio de aplicación. Así,

CONTINXENCIA COMÚN:

- Os tres primeiros días non se cobra nada, agás que o convenio indique outra cousa.

- Do día 4 ao día 20, percíbese o 60% da Base Reguladora + Complemento recollido no convenio (no caso de que exista).

- A partires do día 21 percíbese o 75% da Base Reguladora + Complemento recollido en convenio (no caso de que exista).

CONTINXENCIA PROFESIONAL:

- Dende o primeiro día percíbese o 75% da Base Reguladora + Complemento recollido en convenio (no caso de que exista).

A quen lle corresponde o pago da prestación por IT?

En caso de continxencia común:

- Nos tres primeiros días e só no caso de estar recoñecido en convenio o abono dunha parte ou da totalidade do salario deses días, será o/a empresario/a quen asuma o pago.

- Do día 4 ao día 15  correspóndelle ao empresario/a.

- A partires do día 16 o abono é responsabilidade do INSS, ISM ou Mutua (no caso de que o/a empresario/a teña contratado o abono da prestación por continxencia común coa mutua), aínda que sexa o/a empresario/a quen realiza o pago material en concepto de pago delegado (a empresa aboa a prestación na contía que corresponda como se se tratase do salario; a empresa recibe o importe aboado en forma de desconto no pago dos seguros sociais). Esta situación remata, se non se produce a alta antes, o último día do mes no que a Entidade Xestora competente teña ditado resolución na que se declare a prórroga (logo de chegados os 365 días) ou o inicio dun expediente de incapacidade permanente. A partires desa data o/a traballador/a recibirá a prestación, na modalidade de pago directo, da Seguridade Social ou da Mutua.

En caso de continxencia profesional:

- O abono é responsabilidade da Mutua, do INSS ou do ISM, aínda que a materialidade do pago a realice o/a empresario/a en concepto de pago delegado. Igual que no caso de continxencia común esta situación remata, se non se produce a alta antes, o último día do mes no que a Entidade Xestora competente teña ditado resolución na que se declare a prórroga (logo de chegados os 365 días) ou o inicio dun expediente de incapacidade permanente. A partires desa data o/a traballador/a recibirá a prestación, na modalidade de pago directo, da Seguridade Social ou da Mutua.

Nota.- No caso de estar a percibir prestacións contributivas por desemprego e se pase á situación de IT, o Servizo Público de Emprego Estatal (SPEE) aboará a prestación por IT en réxime de pago delegado ata que se esgote a prestación por desemprego, máis as cotizacións á Seguridade Social (aportación da empresa e do/a traballador/a). Se se continúa en situación de IT esgotado o período de desemprego, pasa a aboar a prestación o INSS.

Situacións nas que INSS, ISM ou Mutua son responsables do pago directo da prestación:

• - Cando se trate de entidades e organismos excluídos do pago delegado.
• - Por incumprimento da obriga patronal do pago delegado.
• - No caso de empresas con menos de dez traballadores/as e máis de seis meses consecutivos de abono do subsidio, que o soliciten.
• - Extinción da relación laboral estando o/a traballador/a en situación de IT.
• - Continuación da situación de IT tras cese voluntario na empresa.
• - Continuación da situación de IT, extinguido o período de percepción de desemprego.
• - Alta médica por informe proposta de perceptores da prestación por desemprego.
• - Cando se trate de representantes de comercio, profesionais taurinos e artistas. Neste último caso, cando a duración do contrato exceda de 30 días.
• - Nos supostos de esgotamento da IT por  transcurso do prazo máximo, durante a prórroga de efectos da prestación ata a cualificación da IP.
• - Por pasar á prórroga de IT logo de 12 meses, tras a resolución da Entidade xestora, salvo que o/a traballador/a ao iniciar a IT estivera a percibir prestación contributiva por desemprego, caso no que aboa o SEPE a  prestación en réxime de pago delegado ata o esgotamento do desemprego.
• - Por iniciar expediente de IP, trala resolución da Entidade xestora.
• - No suposto de que o Instituto Nacional da Seguridade Social emita resolución pola que se acorde alta médica, cesará a colaboración obrigatoria das empresas no pago da prestación o día en que se dite  resolución, aboándose directamente pola entidade xestora ou mutua colaboradora coa Seguridade Social o subsidio correspondente durante o período que transcorra entre a data da resolución e a notificación ao interesado/a. As empresas  que colaboren na xestión da prestación económica por incapacidade temporal  estarán obrigadas ao pago directo do subsidio correspondente ao referido período.

É preciso indicar que dada a complexidade da problemática da Incapacidade Temporal, esta información ten un carácter xeral. No caso de precisar asesoramento para clarificar dúbidas en relación a casos particulares o Gabinete Técnico Confederal de Saúde Laboral ten a disposición un punto de asistencia en liña accesible a través da portada da web www.cigsaudelaboral.org, así como puntos de asistencia presenciais (ver contacto na mesma web).

Máis información en http://www.seg-social.es/

Podes imprimir este artigo, en formato folleto, no PDF adxunto.