Portada
Gabinete
Recursos técnicos
Igualdade
Denuncias
Enlaces de Interese
Contacto
20/6/2016
Facebook Twitter Google Plus Menéame del.icio.us Chuza
compartir

Unha nova morte na Galiza na tala duns piñeiros

Accidente laboral
Un traballador monfortino morreu aos 34 anos de idade vítima dun accidente mortal durante unha tala forestal, supoñendo o quinto accidente mortal na industria madeireira galega nun ano. O traballador acudira cun grupo de compañeiros da empresa madeireira de Sober na que traballaba a realizar unha curta de piñeiros nun dos monte comunais da ladeira sur do Alto dá Moá, que separa os municipios de Ribas de Sil e San Xoán de Río. O traballador morreu esmagado polo tronco dun piñeiro que estaba a cortar, nun sinistro ocorrido nunha zona de monte de difícil acceso e que sufrira un importante incendio durante o verán pasado.

Foron os seus propios compañeiros os que deron a voz de alarma pouco despois das dúas da tarde, non habendo testemuñas directas de como ocorreu o accidente.

Avisados os servizos de emerxencia, os primeiros en chegar foron os sanitarios dunha ambulancia do 061 con base en Quiroga, que acudiron cunha médica e unha enfermeira do centro de saúde de San Clodio. Non puideron facer nada, porque o traballador xa estaba morto. Ao lugar acudiron tamén varias patrullas da Garda Civil e os bombeiros de Monforte, que, segundo a información facilitada polo servizo de emerxencias 112, retiraron a árbore que caera encima da vítima.

Mentres os seus compañeiros de traballo permanecían uns centos de metros máis abaixo, na estrada que leva de Cabanelas a Fraga, o cadáver permaneceu no monte aínda catro horas máis. Había que esperar a que chegasen o forense e os axentes da policía xudicial que tiñan que inspeccionar o lugar para descartar calquera rastro de agresión. Finalmente, o forense renunciou a subir ata o lugar do suceso e o corpo foi levantado pasadas as sete da tarde, despois de que os axentes sacasen fotos e comprobasen o estado do corpo e os arredores do sinistro.

O corpo tivo que ser trasladado en padiola a través da devesa, por unha forte pendente de varios centos de metros de lonxitude, empregados dunha funeraria e persoal de Protección Civil de Ribas de Sil e do grupo de emerxencias de Folgoso-Quiroga.

Con la financiación de/ Co financiamento de:
DI-0015/2009, AD-0002/2011, DI-0001/2011, DI-0001/2012, DI-0001/2013, DI-0001/2014, DI-0001/2015. Os contidos publicados son responsabilidade exclusiva do Gabinete Técnico Confederal de Saúde Laboral da Confederación Intersindical Galega e non reflicte necesariamente a opinión da Fundación para a prevención de riscos laborais