Crean novos métodos para facer biocombustible ou azucres coa palla de cereal09-12-2015 - I+D+iInvestigadores da Universidade de Vigo colaboran nun proxecto da Universidade de Córdoba que traballa na obtención de nanofibras de celulosa. O investigador Gil Garrote, da Facultade de Ciencias do campus de Ourense, participa no proxecto liderado pola Universidade de Córdoba e o Campus de Excelencia Internacional Agroalimentaria co obxectivo de aproveitar os refugallos da recolección agrícola para a fabricación de materiais de última xeración cos que elaborar nanofibras de celulosa, limpar verteduras mariñas de petróleo ou crear apósitos sanitarios con sensores biométricos. |
---|
Os resultados desta investigación conxunta foron publicados nun artigo titulado “Agricultural residue valorization using a hydrothermal process for second generation bioethanol and oligosaccharides production” na revista Bioresource Technology, asinado por F. Vargas, E. Domínguez, C. Vila, A. Rodríguez Pascual e Gil Garrote -investigador da Facultade de Ciencias do campus de Ourense-. Segundo explican os científicos do equipo de investigación Biorrefinería de Materiais Lignocelulósicos da Industria Agroalimentaria da Universidade de Córdoba, a celulosa é un dos polímeros máis dispoñibles do planeta pola súa presenza nos vexetais. Este grupo ten unha ampla bagaxe na obtención de papel e cartón a partir da celulosa, buscando agora novos procedementos químicos para obter máis produtos e de maior valor engadido, como hidroxeles ou compoñentes para a formulación de cemento.
Entre estes procedementos está a biorrefinería de materiais lignocelulosos, que permite separar nos residuos agrícolas como a palla de cereal a celulosa, a hemicelulosa e a lignina. O primeiro material é aproveitable directamente para facer papel dende a celulosa chamada nobre, mentres que coas hemicelulosas obtéñense compostos de interese industrial, como por exemplo xilitol. Por último, está a lignina, que está presente na chamada lixivia negra ou licor residual. A colaboración coa Universidade de Vigo permitiu desenvolver novas técnicas na separación da celulosa e a lignina. O proceso disolve a materia prima cun catalizador ácido, obtendo unha fracción rica en hemicelulosas e outra rica en celulosa e lignina. A partir desta fracción líquida caracterizáronse azucres interesantes para a industria alimentaria, como xilitol. A fracción sólida, rica en celulosa, púidose fermentar para a obtención de biocombustibles.
O procedemento desenvolvido durante a investigación parte dun proceso ambientalmente favorable, ao empregar sosa a presión atmosférica. Así obtéñense fibras celulósicas que se utilizarán para a obtención de lignonanofibras de celulosa (con aparencia de xel), e licor negro, rico en lignina. Os investigadores están obtendo lignonanofibras de celulosa mediante procedementos mecánicos, enzimáticos e por oxidación TEMPO, partindo da pasta celulósica sen branquexar, o que implica un menor custe económico e ambiental respecto a outras nanofibras que se obteñen mediante un proceso previo de branqueamento.