Financiado por:
/ Portada / Delegados

Indemnización a unha auxiliar que sofre sensibilidade química logo dun accidente laboral

17-07-2017 - Sentenza

A Sala do Contencioso do Tribunal Superior de Xustiza da Rioxa condenou á Consellería de Saúde do Goberno da Rioxa a indemnizar con 48.000 euros a unha auxiliar de clínica do Hospital Fundación de Calahorra que sufriu un accidente laboral no 2011. A sentenza, que é firme, determina que a partir daquel incidente a traballadora desenvolveu unha síndrome de sensibilidade química múltiple polo que carrexa secuelas «que van facerse notorias nas relacións sociais, familiares e que van limitar a súa actividade laboral e persoal».

Na sentenza recóllese que a vítima prestaba os seus servizos como auxiliar nos quirófanos do centro hospitalario. Nun momento da súa xornada laboral, procedeu a abrir unha lavadora do instrumental clínico cando finalizou o ciclo de lavado e «recibiu a emisión de gases irritantes de forma concentrada, directa e a moi escasa distancia, sufrindo picor de ollos e sensación de afogo».
A emisión de gases, explica a sentenza, estivo causada porque «as mangueiras a través das que se alimenta de produtos químicos a lavadora estaban intercambiadas, de forma que a máquina utilizaría os produtos a temperaturas contraindicadas ou moi elevadas, o que puido dar lugar a ese escape de gas tóxico». O fallo apunta que tanto as mangueiras como os recipientes que contiñan os produtos químicos usados pola lavadora «eran idénticos e facilmente confundibles entre si». De feito, ese erro non se detectou ata 24 horas despois polo que se volveu a facer uso da lavadora o que provocou que «o produto irritante continuase emitíndose e dispersándose polo bloque cirúrxico» e afectase, en días sucesivos, a outros traballadores.
Un día despois do accidente, a traballadora reincorporouse ao seu posto e «comezou a sentir novamente náuseas, vómitos, mareos, inestabilidade e sensación de fraxilidade, acompañados de malestar xeral, así como sensación de hormigueo en cara, pescozo, beizos e lingua, así como irritación nos ollos con forte opresión na cabeza». Tras unha prolongada baixa laboral, a vítima regresou ao seu traballo, pero fíxoo a outro posto «para evitar o contacto con irritantes que puidesen desencadear a sintomatología anterior». Así, incorporouse a consultas externas de oftalmoloxía e dermatoloxía, onde «segue sentindo síntomas en contacto con perfumes intensos, produtos de limpeza, etc.».
 
O fallo recolle tamén os informes médicos que conclúen que os síntomas «se reproducen ante novas exposicións, de forma crónica, ante niveis baixos de exposición» e que melloran «cando se eliminan os axentes causantes», o que determina un diagnóstico: síndrome de sensibilidade química múltiple. Ademais, o apunta que esa patoloxía «ten a súa orixe nos feitos ocorridos na zona de quirófanos do Hospital de Calahorra o día 1 de decembro de 2011».
Despois de apuntar que «non existe [...] un deber de sacrificio pola condición de empregada pública que lle obrigue a soportar as consecuencias da exposición ás sustancias liberadas unha vez aberta a lavadora» e que «era posible incorrer nun erro á hora de identificar as mangueiras», lembra que «a Administración como empleadora, debe proporcionar medios que non poidan dar lugar a erros como o constatado, e ao non acreditarse que actuase así, ha de concluírse que a conduta da Administración demandada neste suposto, de omisión en canto á dotación destes medios, é susceptible de xerar a súa responsabilidade patrimonial».
Así a sentenza do TSX anula a resolución da Consellería de Saúde que desestimou a reclamación da traballadora ao entender que a súa patoloxía «non se deriva de forma exclusiva ou principal do accidente sufrido» e que a «enfermidade ten un carácter evidentemente leve» e obriga á Administración para abonar unha indemnización de 48.000 euros.

Fonte: Diario La Rioja

Empregamos cookies de terceiros para xenerar estatísticas da audiencia (GOOGLE ANALITICS), para o traductor de idiomas (GOOGLE), acollido a “Privacy Shield”.
Se continuas navegando estarás aceitando o seu emprego. Aceptar | Mais información
Confederación Intersindical Galega - Miguel Ferro Caaveiro 10, Santiago de Compostela Versión anterior da páxina Foros Biblioteca Privacidade RSS