Apóstase a nivel organizativo por avaliar a carga vocal á que están expostas as persoas traballadoras, reallizar unha distribución equilibrada do traballo para evitar a sobrecarga da voz, elaborar un programa de pausas e descansos ou un plan de formación inicial e periódico sobre o uso da voz. A maiores, avógase por controlar os factores de risco psicosociais, dotar de medios técnicos para diminuír o uso da voz (taboleiros dixitais,etc.) ou proporcionar micrófonos e altofalantes adecuados.

En canto ás medidas preventivas na contorna física, ínstase a controlar e reducir o nivel de ruído ambiental, a mellorar a acústica da contorna laboral, controlar as condicións de temperatura e humidade evitando as correntes de aire e garantindo unha ventilación adecuada e adecuando o ratio de persoas/alumnado por sala.

No referido ás medidas preventivas persoais, cómpre realizar exercicios para quentar a voz antes da xornada laboral e para arrefriala ao finalizar, así como non fumar e evitar tomar café nos descansos. Nese senso, avógase por aproveitar as pausas para descansar a voz, por beber auga en cantidade suficiente e regularmente durante a actividade laboral e por realizar controis de vixilancia da saúde específicos en relación co risco derivado do uso mantido e continuo da voz, para a detección precoz de posibles patoloxías vocais.

A guía persegue dar a coñecer tamén os trastornos da voz, identificando os factores de risco relacionados e propoñer medidas preventivas específicas. Tamén difundir técnicas para mellorar o uso da voz considerando catro aspectos fundamentais: hixiene postural, respiración, proxección e arrefriado vocal.

Ligazón á guía de boas prácticas ‘Prevención das enfermidades da voz no ámbito laboral’