A Estratexia Española de Seguridade e Saúde no Traballo 2023-2027 pretende ser un novo marco de referencia que oriente as políticas públicas de prevención de riscos laborais. Esta Estratexia aspira a lograr contornas de traballo seguros e saudables, que contribúan positivamente á saúde das persoas traballadoras, e ao progreso das empresas e da sociedade.

Sinalar que por primeira vez, a saúde mental figura entre as prioridades da Estratexia, poñerase en marcha unha Axenda Nacional para a Prevención do Cancro de Orixe Profesional, impúlsase a perspectiva de xénero para atender de forma máis certeira á saúde e a prevención de riscos laborais, mellorarase a protección de colectivos vulnerables que conten con maiores taxas de sinistralidade e abrirase unha nova mesa de diálogo social para actualizar o marco normativo da PRL, entre outros.

Co obxectivo de conseguir a maior eficacia posible na mellora das condicións de seguridade e saúde no traballo e tentar anticiparse e xestionar as posibles ameazas e riscos para a saúde das persoas traballadoras que emerxen co cambiante mundo laboral, a Estratexia foi elaborada ao redor de seis obxectivos estratéxicos:

• Mellorar a prevención de accidentes de traballo e enfermidades profesionais.
• Xestionar os cambios derivados das novas formas de organización do traballo, a evolución demográfica e o cambio climático.
• Mellorar a xestión da seguridade e a saúde nas pemes, unha aposta pola integración e a formación en prevención de riscos laborais.
• Reforzar a protección das persoas traballadoras en situación de maior vulnerabilidade.
• Introducir a perspectiva de xénero no ámbito da seguridade e saúde no traballo.
• Fortalecer o sistema nacional de seguridade e saúde no traballo para afrontar con éxito futuras crise.

O Consello de Ministros, reunido o 14 de marzo de 2023, aprobou a Estratexia Española de Seguridade e Saúde no Traballo (EESST) 2023-2027, froito do consenso entre a Administración Xeral do Estado, as Comunidades Autónomas e os interlocutores sociais.

Ligazón á Estratexia Española de Seguridade e Saúde no Traballo 2023-2027