Galiza dispón dunha superficie de 29.574 km2, dos que un 95´5% (28.108,7 km2) corresponden con terreos cinexéticos.

Dentro deles, existen 454 tecores que ocupan unha extensión dunhas 270.402,4 ha., cunha superficie media de 5.956 hai. Constan 23 explotacións cinexéticas comerciais autorizadas. A actividade económica que move a caza cífrase no ámbito dos 90 millóns de euros anuais.

Entre as principais novidades desta Lei poden destacarse:

• Introduce novidades na xestión dos terreos cinexéticos: permite a regulación dos vedados de caza autorizando a repartición da superficie mínima do 10% do tecor, que impón a lei, en porcións menores (de ata 50 ha); elimina o deber dunha duración mínima de vedado.
• Refórmase o réxime de aplicación das zonas de seguridade (aquelas nas que, como norma xeral, non está permitida a práctica da caza, circular con armas cargadas ou disparar na súa dirección). No texto, as zonas de seguridade ocupan un capítulo específico e concrétase que terán a consideración de zonas de seguridade as vías públicas, sempre que se encontren debidamente sinalizadas como tales, así como as súas marxes e servidumes.

Ademais, contémplase que, con carácter excepcional, poderá autorizarse a caza nas marxes das vías públicas, así como nas canles e marxes dos ríos e regueiros que atravesen terreos cinexéticos ou constitúan o límite entre eles, se as condicións permiten o exercicio seguro da caza (previa a autorización correspondente).

Define o cazador como elemento fundamental da caza, sinálalle os seus deberes e fíxanse de xeito expreso as súas responsabilidades no exercicio desta actividade.

• Delimita a responsabilidade dos titulares dos tecores e das explotacións cinexéticas comerciais.
• Establece a figura do responsable das cazarías, figura clave para a organización das cazarías colectivas de caza maior a quen lle corresponde velar porque se cumpran as normas éticas e de seguridade no desenvolvemento da acción venatoria. Incorpórase o Fondo de Corresponsabilidade, que se dotará con fondos presupostarios e que intentará poñer en marcha accións preventivas e paliativas dos danos que causen as especies cinexéticas.
• Créase a figura do garda de caza, como voluntaria para os terreos cinexéticos sometidos a réxime especial, con funcións de coidado e control da actividade cinexética no ámbito territorial para o cal sexa contratado.
• O réxime sancionador mantén algúns tipos infractores, modifica a redacción doutros e incorpora como infraccións propiamente ditas, condutas que a lei 4/97 contemplaba como ilícitas pero que logo non cualificaba como infraccións.

Fonte: Ambientum/ CMATI

Ligazón á Lei de caza de Galiza : http://saude-laboral.galizacig.com/novas/6-3-2013/recursos-naturais-e-biodiversidade