Boletín CIG Saúde Laboral Nº 59

24-03-2025 - Gabinete Técnico Confederal de Saúde Laboral

Os riscos psicosociais e as súas consecuencias na saúde mental e física son algúns dos aspectos máis difíciles de atallar no ámbito da seguridade e a saúde no traballo (SST). Ademais do seu efecto prexudicial na saúde individual, os riscos psicosociais tamén poden afectar negativamente á eficiencia das organizacións, así como ás economías dos Estados. Entre as persoas traballadoras europeas, o estrés, a ansiedade e a depresión constitúen o segundo problema de saúde laboral máis común. As cuestións relacionadas coa saúde mental e os problemas no lugar de traballo séguense asociando ao medo e ao estigma. A proporción de persoas traballadoras que declaran enfrontarse a factores de risco que poden afectar negativamente á súa saúde mental é de case o 45 %. Con todo, cando se expoñen como un problema de organización e non como un fallo individual, os riscos psicosociais poden abordarse da mesma maneira estruturada e organizada que outros riscos para a saúde e a seguridade no traballo.