Boletín CIG-Saúde Laboral Nº 66

27-04-2026 - Gabinete Técnico Confederal de Saúde Laboral

A saúde mental constitúe hoxe por hoxe un dos piares esenciais para comprender o benestar das persoas, a cohesión social e a sustentabilidade dos sistemas produtivos. A súa relevancia, lonxe de limitarse ao ámbito sanitario, esténdese ás políticas públicas, dinámicas laborais e condicións de vida que determinan a capacidade das persoas para desenvolver proxectos vitais plenos. Neste contexto, o Consello Económico e Social de Galicia presenta o Informe Saúde Mental en Galicia, un documento que destaca pola súa amplitude, rigor metodolóxico e capacidade para ofrecer unha visión integrada dun fenómeno crecente e complexo. Un dos eixos do Informe é a saúde mental no mundo do traballo, un ámbito no que se manifesta con especial intensidade a interacción entre factores organizativos, condicións laborais e benestar psicolóxico. A exposición continuada a cargas de traballo excesivas, presión temporal, falta de control sobre as tarefas, inestabilidade contractual, escasa participación nas decisións, conflitos interpersoais ou ausencia de recoñecemento, constitúen factores desencadeantes de malestar emocional e deterioración psicolóxica que, de non seren abordados, poden derivar en problemas de saúde mental de diversa gravidade.