Financiado por:
/ Portada / Delegados

O Ministerio Fiscal considera que a crise desvía a atención da sinestralidade laboral

25-09-2012 - SAÚDE LABORAL

O Ministerio Fiscal alertou de que a crise económica está a relegar a un segundo plano a auténtica dimensión do problema da sinestralidade laboral, que en 2011 provocou 520 mortes e máis de medio millón de lesionados en accidentes no traballo. Segundo a memoria anual das actividades en 2011, presentada polo Ministerio Fiscal, produciuse unha "especie de apatía" tanto nos medios de comunicación coma en campañas institucionais, o que trascende ao tecido social.


Isto tradúcese en que mesmo os órganos xudiciais consideren que o ámbito de sanción destas condutas é o administrativo, relegando a aplicación de normas penais que sancionan os casos máis graves.


Neste mesmo contexto, a Fiscalía considera que se está a producir unha "certa atenuación" no nivel de autoesixencia dos empregadores respecto ao cumprimento rigoroso das normas de seguridade laboral, polo que pide "tolerancia cero" ante este tipo de accidentes e que se manteña por enriba da conxuntura económica.


Por iso, apela tamén aos medios de comunicación a que presten a atención que merece a esta materia, así como que coincida coa publicación trimestral dos datos que elabora o Ministerio de Emprego e Seguridade Social.


A memoria sinala que os accidentes laborais seguiron un camiño descendente dende 2007 e os mortais pasaron de 844 nese ano a 520 en 2011, un 38,4% menos; mentres que os graves se reduciron un 51,1% e os leves o 46,3%.


Non obstante, a Fiscalía insiste no efecto colateral "perverso" que produce esta diminución das cifras porque se traduce nunha especie de "sordina" ante a "dolorosa realidade" dos miles de resultados lesivos que a actividade no traballo segue producindo.

Ademais, subliña que nese quinquenio a Seguridade Social perdeu 1.475.999 traballadores, (o 9,2% menos), co que malia unha primeira lectura "favorable" non se pode cualificar de "rotundamente positiva" pola diminución da actividade laboral en practicamente todos os sectores, especialmente a construción.


Aínda que sinala que a crise económica foi a principal causa desta mellora nos datos, indica que tamén se produciu un cambio de actitude por parte dos que interveñen nos sectores onde poden producirse os accidentes.


Outra das causas é que houbo unha coordinación máis eficaz entre as diferentes instancias que interveñen na vixilancia e control das normas de prevención laboral.


Neste sentido, subliña que o número de escritos de acusación ao ano se situou en torno aos 850 dende 2009.


Segundo a memoria, as sentenzas ditadas polos xulgados do penal aumentaron o 0,7% en 2011 respecto a 2010.


Por outra parte, tamén advirte de que a fase de instrución dos casos se dilata de forma "excesiva" nos xulgados de instrución e nos do Penal.


Das 482 sentenzas remitidas á Fiscalía o 80,3% (387) foron condenatorias e o 19,7% (95) absolutorias.


No caso das condenatorias 232 foron por accidentes na construción; 84 na industria; 27 en servizos, 16 en agricultura e 28 en diversas empresas.


Para a Fiscalía, resulta preocupante o tempo medio que se tarda en ditar as sentenzas condenatorias, que foi en 2011 de 60,5 meses.

 


Fonte: finanzas.com

 

 

A Memoria da Fiscalía Xeral do Estado recolle a actividade do Ministerio Fiscal desenvolvida durante o ano inmediatamente anterior ao da súa publicación, así como a evolución da criminalidade, a prevención do delito e as reformas convenientes para unha maior eficacia da Xustiza.


Nela recóllense tamén as observacións das Memorias que os Fiscais dos distintos órganos elevan á súa vez ao Fiscal Xeral do Estado.

Empregamos cookies de terceiros para xenerar estatísticas da audiencia (GOOGLE ANALITICS), para o traductor de idiomas (GOOGLE), acollido a “Privacy Shield”.
Se continuas navegando estarás aceitando o seu emprego. Aceptar | Mais información
Confederación Intersindical Galega - Miguel Ferro Caaveiro 10, Santiago de Compostela Versión anterior da páxina Foros Biblioteca Privacidade RSS